ब्रेकिंग

गुन्हेगारी जगत

यूट्यूबर जसबीर सिंग याचा कोठडीतील मुक्काम वाढला

Wrutuja pandharpure
08 Jun 2025

चंडीगढ : पाकिस्तानसाठी हेरगिरी केल्याच्या आरोपाखाली अटकेत असलेला यूट्यूब जसबीर सिंग याच्या पोलिस कोठडीत मोहाली न्यायालयाने शनिवारी दोन दिवसांची वाढ केली.जसबीर याला ४ जून रोजी पोलिसांनी अटक केली होती. त्यानंतर, न्यायालयाने तीन दिवसांची पोलिस कोठडी सुनावली होती. या कोठडीची मुदत काल संपणार होती. त्यामुळे, त्याला काल न्यायालयासमोर उभे करण्यात आले. पोलिसांनी सात दिवसांच्या कोठडीची मागणी केली होती. मात्र, न्यायालयाने दोन दिवसांची पोलिस कोठडी सुनावली, असे वकिलांनी सांगितले.

जसबीर हा रुपनगर जिल्ह्यातील महलान गावातील रहिवासी असून तो ’जान महल’ नावाचे यूट्यूब चॅनेल चालवत होता. तो हेरगिरी प्रकरणात अटकेत असलेल्या यूट्यूबर ज्योती मल्होत्रा हिच्या संपर्कात होता. ज्योती हिला मे महिन्यात हिसारमधील न्यू अग्रसेन एक्स्टेंशन येथून पोलिसांनी अटक केली होती. त्याआधी, पाकिस्तानसाठी हेरगिरी करत असल्याच्या संशयावरून पोलिसांनी पंजाब, हरयाना व उत्तर प्रदेशातून ११ जणांना अटक केली होती.

ज्योती नोव्हेंबर २०२३ पासून पाकिस्तानी उच्चायोगातील कर्मचारी एहसान-उर-रहीम उर्फ दानिशच्या संपर्कात होती. भारताने १३ मे रोजी दानिशची हकालपट्टी केली होती.जसबीर हा दानिशच्या निमंत्रणावरुन दिल्लीत एका कार्यक्रमात सहभागी झाला होता. शिवाय, तो तीन वेळा (२०२०, २०२१, २०२४) पाकिस्तानला गेला होता. त्याच्याकडे पाकिस्तानातील अनेकांचे दूरध्वनी क्रमांक आढळून आले आहेत.